Forritunarkennsla á miðstigi

Í 6.-7. bekk Sæmundarskóla er boðið upp á smiðjur sem ná yfir 2×70 mínútna kennslulotur. Hver smiðja stendur yfir í 6 vikur og eru fjölbreytt viðfangsefni í boði. Forritun er meðal þeirra viðfangsefna sem nemendur geta valið sér og í núverandi smiðju er verið að vinna í Code.org. Hægt er að vinna í forritunarumhverfinu á spjaldtölvur og reynist best að nota netvafrann frá Chrome.

Á vefsíðunni Code.org býr kennarinn til hópaðgang fyrir þann nemendahóp sem hann er með hverju sinni.

code_synishorn3

 

Hver nemandi skráir sig inn á eigin notendanafni og lykilorði. Inni á þessum aðgang hefur kennarinn yfirlit yfir hvar nemendur eru staddir í kennsluferlinu.

code-maelabord650

Forritunarnámskeiðið skiptist niður í 20 áfanga sem inniheldur mismargar þrautir. Í upphafi læra nemendur að vinna með einfaldar skipanir, aðgerðir og hugtök sem verða fleiri og flóknari með hverjum áfanganum sem nemandinn nær að ljúka.

Á undan hverjum áfanga er í boði að horfa á kennslumyndband þar sem kynntar eru aðgerðir sem þarf að nota til að leysa næstu þrautir. Í myndbandinu er einnig sagt frá hvernig forritið notar aðgerðina og tengir hana við daglegt líf. Búið er að þýða forritunarumhverfið að mestu yfir á íslensku og setja íslenskan texta við myndböndin. Eini ókosturinn er sá að ekki er hægt að stilla tungumálið á íslensku í spjaldtölvum þó svo að valmöguleikinn sé til staðar.

[do action=“video“ id=“m2Ux2PnJe6E“ position=“center“ device=“s4-white-landscape“/] 

Í forritunarsmiðju er vikið frá bókastýrðri kennslu þar sem nemendur vinna afmörkuð og skapandi verkefni með sýnilegum árangri og vinnuframlag hvers og eins verður markvissara. Nemendur vinna einstaklings- eða paraverkefni þar sem þeir eru hvattir til aðstoða hvort annað að úrlausn þrauta.

Af þeirri reynslu sem komin er sýnist mér forritun höfða til breiðs hóps nemenda. Námið er einstaklingsmiðað og auðvelt að koma til móts við hvern og einn.

Ummæli frá nemendum

„Forritun er skemmtileg og krefjandi. Maður þarf að passa að flýta sér ekki of mikið og vera þolinmóður. Maður lærir forritunarmál og gera skipanir.“

 

Guðrún Anna Gunnarsdóttir
Stigsstjóri og umsjónarkennari, Sæmundarskóla

Lokað er fyrir athugasemdir.