Fréttaþættir á Vimeo

Eftirfarandi verkefni var unnið með nemendum 3ja bekkjar í Sæmundarskóla í Grafarholti.

Fréttamaður, hvað gerir hann?

Við settumst niður með þriðju bekkjar nemendunum okkar og spurðum þessarar spurningar. Við skoðuðum vídeóklippur af fréttamönnum að störfum og hlustuðum eftir þeim atriðum sem einkenna tal þeirra. Í framhaldi voru útbúnar leiðbeiningar á fréttamanna svæði (hringekju fyrirkomulag þar sem nemendum er skipt í hópi og vinna mismunandi verkefni) og leitað var eftir greinum úr dagblöðum og tímaritum sem talið var að myndi höfða til nemenda.

Þegar nemandi kom á fréttamannasvæði valdi hann sér grein og skrifaði upp úr henni frétt. Fréttin átti að byrja á orðunum: „Fréttaþulur er (nafn). Í fréttum er þetta helst…“ og enda á orðunum: „Fleira er ekki í fréttum. Verið þið sæl“. Þegar nemandi var búinn að skrifa fréttina sína, æfa sig að lesa hana upphátt og taldi sig vera tilbúinn lét hann kennara vita að hann væri tilbúin í upptöku.

Áður en fréttin var tekin upp fékk nemandi leiðsögn í framsögn, hvernig ætti að horfa í myndavélina og tala skýrt og greinilega. Fréttin var síðan tekin upp með spjaldtölvu.

[do action=“mynd“ url=“http://www.snjallskoli.is/wp-content/uploads/2014/03/daniel_frettamadur.jpg“ device=“s5-white-landscape“ align=“center“ size=“small“/] 

Öllum fréttunum var hlaðið í gegnum Vimeo á aðgang sem kennari stofnaði. Hverju myndbandi var læst með lykilorði. Slóð á myndband og lykilorð var síðan sent á netföng foreldra viðkomandi barns. Svo var það val foreldra hvort og þá hversu víða þau dreifðu myndbandi (lykilorði) af sínu barni. Verkefnið mæltist mjög vel fyrir í nemenda- og foreldrahópnum.

Vimeo var valið eftir að kennari spurði alla foreldra á fundi hvernig hægt væri að deila myndbandsupptökum úr skólastarfinu án þess þó að allir gætu séð. Foreldri úr hópnum sem hefur notað Vimeo mikið í sínu starfi mælti með því og tók sig til og mætti í skólann einn morguninn og kenndi kennara á appið. Skólinn keypti að lokum auka aðgang að Vimeo en honum fylgir meira geymslupláss (e. storage space), fleiri möguleikar á aðgangsstýringu (e. video privacy options), engar auglýsingar og einnig tók styttri tíma að hlaða inn myndböndunum.

Það tók tíma fyrir kennara að koma verkefninu af stað þ.e. kynna sér Vimeo og hlaða inn myndböndum og deila, en nú þegar hefur kennari nýtt sér Vimeo í ýmis önnur verkefni og fleiri eru í burðarliðnum.

 

Kristjana Pálsdóttir

Umsjónarkennari í 3. bekk Sæmundarskóla

Lokað er fyrir athugasemdir.